техникалық қызмет көрсету және жөндеу пункті

(Пункт технического обслуживания и ремонта)

техникалық қызмет көрсету, қару-жарақты, әскери және басқа да техниканы күнделікті жөндеумен қатар, шектеулі жұмыстар жүргізуге арналған әскери бөлім паркінің негізгі элементтерінің бірі. Т.қ.к.ж.п. тұрақты парктерде бекітілген үлгілік жобалар бойынша салынып, аккумуляторлық және су, май қыздырғыш бөлімдермен біріктірілуі мүмкін. Олардың ішкі құрылысы қабылданған қызмет көрсету ауқымына және машиналар мен қару-жарақты жөндеу технологиясына байланысты болады. Әдетте, Т.қ.к.ж.п-нде шынжыртабанды және дөңгелекті машиналарға техникалық қызмет көрсету мен күнделікті жөндеу орындары, агрегаттарды күнделікті жөндеу, слесарьлық-механикалық, электргаз дәнекерлік, ұста-қаңылтырлық, қаруды жөндеу мен қызмет көрсету, электрлік арнайы жабдықтар, оптикалық аспаптар, радио және жанармай аппараттары, шина монтаждық және желімдеу, шанақтарды, орындықтарды жөндеу және т.б. жұмыстары атқарылатын орындар жабдықталады. Машиналарға Т.қ.к.ж.п-нде жылжымалы қабырғалар мен диагностикалық бақылау аспаптары бар, қажетті құралдармен жабдықтал-ған машиналардың техникалық жағдайын тексеру қызметі орналасады. Т.қ.к.ж.п. табельді жабдықпен және, әдетте, арнайы жұмыс орындарында, машиналар мен жеке агрегаттарды жөндеу мен қызмет көрсету учаскелерінде орналастырылған қызмет көрсету мен жөндеуді механикаландыру құралдарымен жабдықталады. Әскери бөлімде бар машиналардың санына, түрі мен маркаларына және орындалатын жұмыс көлеміне байланысты Т.қ.к.ж.п-н жабдықтау үшін бір немесе бірнеше технологиялық жабдықтар толымы қолданылады.